مع السلامه ياغرام الروح ياشوق السنين
............................. ودعتك إللي ماتخون فالعرب ودايعه
العين تبكي ساهره والقلب إي والله حزين
............................. من بعد عينك مابقى إلا سنين عمرن ضايعه
وشلون ياخذك الدهر وشلون تصبح تحت طين
............................. وشلون تتركني كذا عقب الحياة الرايعه
والله لولا الخوف من ربي ونغزات اللعين
............................. إن كان أقول إنه مماتك ياغناتي شايعه
ياكيف بنسى ضحكة إشفاهك وطلعات الجبين
............................. وزولك يصدر بي ويورد فالدجى بضايعه
يازوع قلبي يوم أبًرق فاليسار وفاليمين
............................. وماباقي إلا ذكرياتن وسط قلبي لايعه
ياوجد حالي وجد منهو قاضين عمره سجين
............................. ودموع عينه ماتقول إلا شموعن مايعه
لامن تذكر ضحكة ( أعجيزُه ) وصفق فاليدين
............................. يفوع قلبه من غبن والكبد وسطه فايعه
لبيه يادموع الفرح ياوين بلقاها ياوين
............................. وأنا مثل طفلن من الأفراح كبده جايعه
حسبي على صدوف الزمن ماتاخذ إلا الطيبين
............................. ولا الردي لو مايطيع الوقت جالك طايعه
مع السلامه بعتزل عن دربكم ياعاشقين
............................. والله يصبرني ليا زاد الزمن فجايعه
مع السلامه قلتها لكن باقي حاجتين
............................. نذرن علي محدن يجي في عفته وطبايعه
موضوع: مع السلامة ............... 
الخميس فبراير 26, 2009 11:46 pm